(لەبارەی ئیسلام و جیهانگیری و خۆرئاواوە) دەکرێت بە کوردی

Têkst

سولی ئۆن وێب
ئامادەکردنی: ئاراس عەبدوڵڵا

"لەبارەی ئیسلام و جیهانگیری و خۆرئاواوە" کتێبێکی نووسەری بەڕەچەڵەک ئوردنی و هەڵگری ڕەگەزنامەی ئەمریکی شاكر نابلوسی-یە (1940-2014) کە یەكێكە لە نووسەرە لیبرالەكانی ناو كایەی ڕۆشنبیریی عەرەبی. لە شەستەكانی سەدەی ڕابردووەوە لەگەڵ نوسین‌ و وەرگێڕاندا خەریكە. ئەم کتێبەی نووسەر لەلایەن نووسەر و وەرگێڕ شوان ئەحمەدەوە بۆ زمانی کوردی وەرگێڕدراوە و بڕیارە لە ئایندەیەکی نزیکدا لەلایەن ناوەندی رۆشنبیری و هونەریی ئەندێشەوە چاپ و بڵاوبکرێتەوە.

دەربارەی ئەم کتێبە، شوان ئەحمەد وەرگێڕی کتێبەکە بە سولی ئۆن وێبی ڕاگەیاند: "ئەم كتێبەی نووسەر بەشێكە لەو پرۆژە گەورەیەی کە لە نەوەدەكانی سەدەی ڕابردووەوە دەستی داوەتێ‌. لەیەك بەیەكی وتارەكانی ئەم كتێبەدا، بەدیدگایەكی ڕەخنەگرانە و پشت ئەستور بەداتاو زانیاریەكی ورد، قسە لەسەر مەسەلە هەنوكەییەكانی دنیاو كۆمەڵگەی ئیسلامی ‌و خۆرئاوا و سەردەمی جیهانگیری دەكات."

وتیشی: "شاكر نابلوسی بەراود بە شارستانیەتێكی زەبەلاحی وەك شارستانیەتی خۆرئاوا، دەیەوێت كەلێن ‌و قەیران‌ و كەموكوڕیەكانی جیهانی ئیسلامی نیشان بدات‌و ئەو مەسافە گەورەیە زەق بكاتەوە كە لە سەردەمی جیهانگیریدا، كەوتۆتە نێوان ئیسلام ‌و خۆرئاوا و موسڵمانان‌ و میللەتانی پێشكەوتووی دنیا. لەناوەندی ڕۆشنبیری عەرەبی ‌و ئیسلامیدا، لەلایەن نوسەران‌ و وەعز خوێن‌ و ئایدیۆلۆژیست‌ و ڕابرددوو پەرستەكانەوە، هەوڵێكی بێئامان دەدرێت بۆئەوەی بەتۆبزی‌ و بەزۆری زۆرداری، شارستانیەتی ئیسلام ‌و واقعی حاڵی موسڵمانان، بەشێوەیەكی زۆر ئیدیال ‌و نمونەی‌ و نۆرماڵ پیشان بدرێت."

وەرگێڕی کتێبەکە دەربارەی ئەو بۆچونەی ناو ئەو جۆرە لە شارستانییەت زیاتر دوا و وتی: "واتە ئەوانە لەبری ڕەخنە ستایش ‌و لەبری هەقیقەت وەهم ‌و لەبری دەست بردن بۆ چاوگی كێشەكان، خۆدزینەوە پەیڕەودەكەن. لای ئەوانە ئیسلام‌ و موسڵمانان بێ‌ عەیب‌ و عارن، گەر پلانی خۆرئاوا و ناحەزان لێگەڕێت.. ئیسلام‌ و موسڵمانان كرانەوە و ئاشنابوون بە كلتورەكانی دیكەیان پێویست نییە، چونكە خۆیان لەهەموو شتێكیان زیادە."

سەبارەت بە هەوڵی نووسەر لەم کتێبەدا شوان ئەحمەد ڕوونیکردەوە: "بەشێكی شەڕ و ململانێی شاكر نابلوسی ‌و نوسەرە لیبرالە بەژمارە كەمەكانی دیكەی ناو ڕۆشنبیری عەرەبی، دژی ئەم دۆگما و وەهم سازیەیە كە ئەو ئایدیۆلۆژیستانە كاری بۆ دەكەن. ئەم كتێبە هەوڵێكە بۆ لەقكردنی ئەو قەناعەتانە و بانگەوازێكیشە بۆ بەخۆداچونەوە و كرانەوە."